Don’t forget the adjusting entries ?
ومن أهم الحاجات اللى لازم تاخد بالك منها فى ال closing هى ال Adjusting entriesانت بتقعد طول الفترة تسجل فى transactions عشان تيجى فى الأخر وتطلع ال financial position بتاع الشركة يعنى تقولنا الشركة ليها ايه وعليها ايه وكمان ال Operation results يعنى كسبانة ولا خسرانة , عشان كده بنيجى فى أخر كل فترة ونتفحت شغل وقال ايه عندنا Closing
فى الأول يعنى ايه و ليه بنعمل Adjusting entries ؟
ليه – عشان زى ما أنت عارف ان ال accounting بتشتغل Accrual base
يعنى ايه – يعنى انا عايز أظهر فى نتيجة أعمال الفترة كل اللى ليا واللى عليا فيما يخص الفترة دى بس
وتعالى نتكلم بالأمثلة عشان نفهم الموضوع كويس
وأنت قاعد فى شركتك لقيت الادارة هتمضى عقد شقة عشان تعملها فرع جديد فى تاريخ 1/10/2015وهتدفع ايجار سنوى قيمته 12000 جنيه
فى تاريخ 1/10/2015
هتسجل القيد ده
Dr. Prepaid Rent Expense 12000
Cr. Cash 12000
االقيد ده بتخفض فيه ال Cash بالفلوس اللى طلعت وبتقول عليه مصروف مدفوع مقدم وبيظهر فى ال Assets يعنى لسه مبقاش مصروف ولو انت مش عارف ليه ممكن تروح تفتكر قاعدة الاعتراف بالايراد والمصروف من هنا
فى تاريخ 31/12/2015
وانت بتعمل Closing , هتلاقى أن ال 12000 مش كلهم لسة مصروف مقدم بدليل أنك استخدمت المكان فعلا لمدة 3 شهور , يعنى المفروض تعترف بالمصروف اللى يخص 2015 بالقيد ده
Dr. Rent Expense 3000
Cr. Prepaid rent expense 3000
يعنى أنت كده خفضت الأصل واعترفت بالمصروف اللى يخص الفترة
وبكده تكون عملت أول Adjusting entry على ال Prepaid Expenses
تعالى بقى نروح للمحاسب بتاع الشركة اللى أنت أجرت منها الشقة نشوفه بيعمل ايه
فى تاريخ 1/10/2015
هتلاقيه بيعمل القيد ده
Dr. Cash 12000
Cr. Unearned Rent Revenue 12000
وكده هو بيثبت الفلوس اللى دخلت عنده بس بيقول عليها ايراد غير محقق وده بيظهر فى الالتزامات اللى على الشركة – يعنى لسة مبقاش ايراد ولو أنت مش عارف ليه – برده هقولك ممكن تروح تفتكر قاعدة الاعتراف بالايراد والمصروف من هنا
فى تاريخ 31/12/2015
هو كمان عنده Closing , هيبص يلاقى أن الفلوس اللى خدها مش كلها لسة التزام عليه بدليل أنه سايبلك الشقة بقاله 3 شهور, يعنى المفروض يعترف بالايراد اللى يخص 2015 بالقيد ده
Dr. Unearned Rent Revenue 3000
Cr. Rent Revenue 3000
يعنى هو كده خفض الاالتزام اللى عليه واعترف بالايراد اللى يخص الفترة
وبكده يكون عمل أول Adjusting entry على ال Unearned Revenues
وطبعا ممكن أنت تكون مكانه وهو يكون مكانك لأن نفس الشركة ممكن يحصل فيها الحاتين مع بعض
وبكده تكون طبقت أول نوع من أنواع Adjusting Entries اللى هو ال Deferrals
وكلمة Deferrals يعنى مؤجلات , وبيسموها كده عشان لو خدت بالك هتلاقى ان أنت أجلت الاعتراف بالمصروف لحد مايتحقق, والمحاسب التانى أجل الأعتراف بالايراد لحد ما يتحقق.
تعالى بقى نلخص الكلام ده, انت كده دلوقتى عرفت ان أول نوع من ال Adjusting Entries هو ال Deferrals ودى عبارة عن حاجتين يعتبروا وجهين لعملة واحدة هما
– Prepaid Expense
– Unearned Revenue
والمرة اللى جاية هقولك ايه النوع التانى من Adjusting Entries ومهمتك دلوقتى أنك تقولى أمثلة تانية غير الأيجار تنفع تكون Deferrals